Ndahet nga jeta ylli i muzikës George Michael

Bota e muzikës humbi një prej legjendave të saj, pasi ikona e muzikës “pop”, George Michael ndërroi jetë në shtëpinë e tij në moshën 53-vjeçare.

Publicisti i tij tha se ylli i “pop”-it, i cili e nisi karrierën me grupin Wham në vitet ’80 dhe që më pas pati sukses të jashtëzakonshëm si këngëtar solo, “vdiq paqësisht ditën e Krishtlindjeve në shtëpinë e tij në Goring, Oxfordshire”. Policia e Luginës së Tamizit tha se po e trajton vdekjen e Micheal si të pashpjeguar, por nuk ka rrethana të dyshimta. Sipas autoriteteve britanike, ekzaminimi “post mortem” do të shpjegojë gjithçka, ndërsa mediat që tani spekulojnë se ikona e muzikës humbi jetën pas problemeve me zemrën.

Homazhe për Micheal kanë ardhur nga e gjithë bota e muzikës dhe nga miliona fansa në të gjithë planetin.
George u bë i famshëm edhe në duetin Wham me shokun e shkollës Andrew Ridgeley, me të cilin dolën katër herë në vendin e parë të hitparadave britanike. Një nga këngët më të njohura të tyre është ‘Last Christmas’.