Ermal Mema vazhdon me sukseset në Itali

Ermal Meta rrëmbeu zemrat e publikut italian me këngën ‘Non mi avete fatto niente’, me të cilën do të përfaqësojë Italinë në ‘Eurovision’ së bashku me Fabrizio Moro.

37 vjeçari vitet e fundit ka pasur sukses të madh dhe rritje në karrierë, duke u bërë kështu i njohur për publikun shqiptar dhe jo vetëm.

Ermal Meta do të nderohet ditën e nesërme nga kryebashkiaku i Barit, duke i dhënë çelësin e qytetit, për shkak të qëndrimit të tij për shumë kohë në këtë vend, e si shenjë vlerësimi për talentin e jashtëzakonshëm dhe suksesin për pjesmarrjen në Eurovision.

Nëpërmjet një postimi në profilin e tij në ‘Facebook’, Ermali ka shkruar: “Ishte viti 1994 dhe isha 13 vjeç, erdha në një qytet që nuk e njihja. Kam takuar njerëz që nuk i kisha parë kurrë më parë dhe dëgjoja një gjuhë që nuk e flisja. Gjithmonë shikoja këmbët e mia kur ecja. “Mos merr ndonjë hap të gabuar”, i thosha vetes, gjithmonë shikoja këmbët e mia, dhe isha i kujdesshëm ku i vendosja. Mësova një gjuhë që nuk e dija dhe ngadalë fytyrat e të huajve u bënë miq. Qoshet e qytetit u bënë gjithnjë e më të njohura. Flisja pak, por ndjeja shumë. Unë ecja duke parë këmbët e mia, e më dukej sikur në asfalt pasqyrohej qielli dhe vazhdimisht mendoja “çfarë do të bëhet me mua”? Atëherë hapat e mi një ditë u ndalën në dërrasat e drunjta dhe ngrita vështrimin. Isha në një skenë dhe dëgjova se ishte e vetmja gjë që doja të bëja, ky ishte i vetmi vend ku doja të isha. E dija çfarë do të ndodhte me mua , kështu që fillova të fluturoja lart. Pas gjithë këtyre viteve qyteti i Barit më jep çelësat e tij dhe ndihem i nderuar dhe mirënjohës për t’i marrë ato. Ata nuk hapin dyer, por kujtimet e mia më të thella. Faleminderit shumë.”

Kujtojmë se Ermali u rendit në vendin e tretë në ‘Sanremo’ në 2017, pati pozicionin e anëtarit të jurisë në ‘Amici’, mori çmimin ‘Best Italian Act’ në MTV EMA dhe më kulminantja, fitoi edicionin e 68-të të edicionit të këngës në Itali. Dhe me shum5 gjasa, ky është vetëm fillimi.