James Arthur, atak paniku në mes të koncertit

Këngëtari britanik, James Arthur ka treguar ditën e djeshme se ka përjetuar një nga momentet më të vështira të jetës së tij, aq të pabesueshme sa mendonte se mund edhe të vdiste në skenë.

Ka qenë një krizë ankthi ajo që ka bërë që këngëtari të përjetojë një ndjenjë frike të tmerrshme, ndërkohë që po performonte në Ribeira Grande, dy ditë më parë.

“Unë pata një krizë ankthi në skenë përpara 12 mijë njerëzve dhe askush nuk më kuptoi, por mendova se do të vdisja në skenë. Kjo është gjëja më e frikshme që kam përjetuar ndonjëherë në jetën time, por i vlerësoj fjalët tuaja të mira. Faleminderit të gjithëve për gjithçka”,- ka shkruar Arthur në “Twitter”.

Për fat gjithçka e ka tejkaluar, edhe pse mendohet se gjithçka ka ardhur për shkak të mbingarkesës dhe stresit.