Largohet nga jeta aktori i njohur

Aktori Verne Troyer, i cili ka qenë më së miri i njohur për paraqitjen në filmat “Austin Powers”, ka ndërruar jetë në moshë 49 vjeçare.

“Me pikëllim të madh dhe zemër të thyer, ju njoftojmë se sot (e shtunë) Verne ka ndërruar jetë. Me vite të tëra ai ka vuajtur dhe ka fituar… por, fatkeqësisht këtë herë nuk ia doli”, shkruan në faqen e tij në Facebook, transmeton BBC.
Gjatë jetës, ai është paraqitur në disa seriale të drejtpërdrejta televizive, duke përfshirë edhe spektaklin britanik të vitit 2009, “Celebrity Big Brother”.

Aktori është paraqitur rregullisht në “Celebrity Juice”, ndërsa ka luajtur edhe në filmin me metrazh të gjatë të Keith Lemon,”Keith Lemon: The Film”.
Në fillim të muajit prill, Troyer ishte shtruar në një spital në Los Angeles, por ekipi i tij nuk kishte treguar se nga çfarë po vuante.
Një vit më parë, ai u shtrua në spital për shkak të varësisë nga alkooli dhe përmes një komunikate i kishte bërë publike të gjitha problemet e tij.

Verne Troyer karakterizohej për gjatësinë trupore prej vetëm 81 centimetrash, si rezultat i akondroplazisë, dhe konsiderohej si një prej njerëzve më të shkurtër në botë.