Shakira anulon sërish koncertet për shkak të gjendjes shëndetësore
Ylli i muzikës pop, Shakira, është detyruar që t’i anulojë të gjitha koncertet e javës së parë të turneut të saj për shkak të problemeve shëndetësore. Këngëtarja kolumbiane, pas anulimit të koncertit në Gjermani, i ka anuluar edhe koncertet në Francë dhe Belgjikë, si edhe koncertin që ishte caktuar për të martën në Amsterdam.
Organizatorët e koncerteve të saj kanë thënë se ky vendim është marrë me rekomandim të mjekut. Koncerti i parë i turneut botëror, El Dorado, ishte caktuar të mbahej në Koln në javën e kaluar, mirëpo u anulua. Këngëtarja u premtoi fansave se do të ricaktonte një datë tjetër për mbajtjen e atij koncerti.
“Me keqardhje ju njoftojmë për anulimin e datave”, kanë thënë promovuesit nga Live Nation që merren me organizimin e koncerteve të Shakirës. Ata kanë shtuar se këngëtarja i falënderon të gjithë që e kanë mbështetur dhe se do të caktojnë data të tjera për mbajtjen e koncerteve, pasi ajo të jetë mirë me shëndet.
Share Post
