Starton “Sanremo 2018”, kritikët vlerësojnë si favorite këngën e Ermal Metës

Ka nisur festivali i 68-të i muzikës italiane, “Sanremo 2018”. Ky festival do të zhvillohet për pesë ditë rresht, në skenën e së cilit do të ngjiten emra të njohur të muzikës italiane.

Edhe kantautori shqiptar Ermal Meta, për të tretin vit radhazi sprovon veten në këtë festival. Meta vjen këtë herë në duet me Fabrizio Moro, me këngën “Nuk më keni bërë asgjë”, dhe trajton temën e rrezikut terrorist.

“Kënga jonë është një rebelim i njerëzimit ndaj frikës së terrorizmit. Gjatë verës, kemi marrë mjaft mesazhe nga fansat tanë të cilët ishin të frikësuar të merrnin pjesë në koncertet tona. Kështu lindi ideja e nevoja për të treguar dëshirën e njerëzve për t’u rebeluar ndaj asaj çka po ndodh. Kjo këngë tregon atë çka njerëzit kanë vuajtur nga terrorizmi, sidomos ai mediatik i këtij viti të fundit”, janë shprehur ata.

Ndërkohë sipas kritikëve muzikorë italianë, kjo këngë mund të jetë dhe fituesja e Festivalit “Sanremo 2018”, përderisa në shumë prej medieve në Itali është cilësuar si favorite.